राजेश सिंह क्षत्री
अऊ ठाकुर बम बने-बने, तरिया पार ले फटफटी म नाहकत परोसी गांव के बुधारू हर नाहकिस त बैशाखू हर अकचकात पूछे लागिस, आऊ ठाकुर तोरो भारी जलवा हे। कल बजार गएंव त मनमोहन बम, अन्ना बम, केजरी बम तो देखे रहेंव फेर मय नइ जानत रहेंव के एक ठन ठाकुर बम मोरो गांव म घलो हावय। त मय हर बैशाखू ल समझात कहेंव के तय हर तो अभी ले देवारी के रंग म रंग के हावस त तोला एके ठन बम दिखत हे। ए हर ओ बम नोहय जउन ल देवारी म फोड़े जाथे, ए हर तो दूसर बम ए ?
बम तो एके ठन होथे ठाकुर, जेन ल देवारी म फोड़े जाथे। अऊ का बम होथे ? ए ठाकुर बम कोन किसम के बम ए। बैशाखू हर फेर पूछिस त मय हर ओला समझात कहेंव, सुन बैशाखू, बम घलो कई किसम के होथे। जगत के सबले बड़े बम तो हमर संकर देवता हर आय। मय हर नानचुक रहेंव अउ इस्कूल जात रहेंव त सावन के महिना म रद्दा रेंगइया मन हर बोल बम, बोल बम कहय त मोला हांसी लागय, तोरे कस महूं हर तब एके ठन देवारी म फुटइया बम ल जानत रहेंव। एक दिन मय हर अपन महतारी तीर पूछ बइठेंव, दाई, रद्दा रेंगइया मन देवारी के बम के जयकारा लगात काहे जाथे, त महतारी हर समझाइस कि बोलबम कहे म भगवान संकर के जयकारा लागथे। पाछू जब बोलबम जाय के मउका लागिस त जानेंव के बोलबम के बस एके ठन बोली, बम ...। महराज ए त महराज बम, ठाकुर ए त ठाकुर बम। साइकिल म जात हे त साइकिल बम अउ रेंगत जात हे त रेंगत बम। ए ठाकुर बम ओही बोल बम के असर ए। ए तो होइस हमर देस के सबले जुन्ना बम। एखरो छोड़े बम कई किसम के होथे। एटम बम, परमाणु बम, अणु बम, देसी बम, विदेसी बम। बम चाहे कइसनों होवय, ओखर असर भारी दूरिहा तक होथे। जब अंगरेज मन हर हमन के आजादी के अवाज ल नइ सुनत रहिस त एक ठन बम अंगरेज मन के आघु म हमर अमर शहीद भगत सिंह ह फोड़े रहिस, इंकलाब जिंदाबाद के नारा के संग फूटे एके ठन बम के अवाज ल सुन अंगरेज मन हर थर-थर कांपे लागे रहिस हे फेर नेताजी सुभाष चन्द्र बोस हर घलो अजाद हिंद फौज बनाके उखर उपर बम के बरसा करे लागे रहिस हे। दुनिया म सबले बड़े बम अमरीका हर जपान के उपर फोड़े रहिस हे तेखर सेती आजो बहुत झन जपानी मन हर बिन हाथ, गोड़, आंखी के जनमथे। एक ठन बम आतंकवादी मन हर मुंबई म फोड़ के हमन ल आपस म लड़वाय के ताक धरे रहिस हे फेर उखर मनसूबा हर पूरा नइ होइस त आजकाल हमर नक्सली भाइ मन हर टिफिन बम, सुतली बम अउ किसम-किसम के बम फोड़े के बुता करत रहिथे। ए बम ल छोड़, चल बता, तय हर देवारी म फोड़े बर बजार ले का-का बम लाने हावस ? ए बखत अपने गोठ ल सिरवात मय हर बैशाखू तीर पूछेंव त बैशाखू हर अपन रोना रोवत कहिस, के का बम लानतेंव ठाकुर, मोला तो ए बखत के एको ठन बम हर समझ नइ आइस के कोन हर फूटही अउ कोन हर सुरसुरा जाही कहिके।
तय तो बम फोरे म भारी एक्सपर्ट हस बैशाखू फेर तोला कइसे बम हर समझ नइ आइस ? ए बखत अकचकाय के बारी मोर रहिस हे त बैशाखू हर कहिस, के पहिली बजार म लक्ष्मी बम अउ कुकरा बम आवय फेर ए बखत बजार म नवा-नवा किसम के बम आय हे, अन्ना बम, रामदेव बम, केजरी बम, मनमोहन बम, गड़करी बम, सोनिया बम, राहुल बम, लालू बम, दिग्गी बम। त मय हर ओला समझात कहेंव के अन्ना बम हर डबल अवाज वाला अउ रामदेव बम हर तीबल अवाज वाला होही। अन्ना बम हर पहिली बखत तो भारी जोर ले फुटत होही के कान के परदा फाट गे लागत होही, अउ जब डर के मारे तीर तखार म रहइया जमो झन हर कान ल तोपत होही त ओ हर फुस ले फुसक जात होही। रामदेव बम हर पहिली जोर से फुटत होही फेर दूसर बखत ओ हर फुसफुसात जात होही अउ तीसर बखत फेर धमाका करत होही। केजरी बम हर कइ अवाज वाला होही जेन हर एक बखत फूटत होही त थोर-थोर देरी म फूटतेच होही। मनमोहन बम हर पउर साल के होही जेन हर बनेच देर तक सूं-सां नइ करत होही, फेर थोरकन फुसफुसा के फुस्स हो जात होही। गड़करी बम हर फोरइया के हाथेच म फुट जत होही त सोनिया बम अउ राहुल बम हर पहिली थोरकन देर तक फुसफुसात होही अउ सोनिया बम हर फुट त राहुल बम हर फाट करत होही। दिग्गी बम हर लरी होही जेन हर फट-फट करत होही अउ लालू बम हर मउका देख के फुटत होही। ए बच्छर के जमो फटाका म सबले जादा महंगा सोनिया बम अउ राहुल बम हर होही।
अइसे का। मोर गोठ ल सुन बैशाखू हर आंखी ल मटकात कहिस, अइसना हे त महूं हर घर हबरके अपन फटफटी म बइठ के अभी बजार जावत हंव। मय हर पूरा बजार ल छान मारहूं अउ अपन मन पसंद फटाका बिसा के आहूं।
अइसन कोन बम तोला पसंद हे बैशाखू जेखर बर पूरा बजार ल छाने पर परय ? मोर पूछती होइस के बैशाखू हर बम-बम होत बताइस, ओ हे ने, का कहिथे तेन सनी(लियोन) बम अउ राखी(सावंत) बम। सनी अउ राखी बम बर बैशाखू के आंखी के चमक ल देख महूं बम-बम होगेंव।