राजेश सिंह क्षत्री
सोना अऊ हीरा के भंडार भरे हे तोर अंचरा म
अंचरा म मइया अंचरा म, अंचरा म मइया अंचरा म
सोना अऊ हीरा के भंडार भरे हे तोर अंचरा म
होवत हावय जय जयकार, छत्तीसगढ़ के दुनिया म
दुनिया म पूरा दुनिया म, दुनिया म पूरा दुनिया म
होवत हावय जय जयकार छत्तीसगढ़ के दुनिया म
सोना अऊ हीरा के भंडार ... ... ...
साल के बन अऊसगोन के छांव हे
बांस के कांटा सरई बीजा शान हे
लाख मऊहा हर्रा अऊ तिखूर भरे हे तोर अंचरा म
तेंदूपाना आंवला बबूल भरे हे तोर अंचरा म
सोना अऊ हीरा के भंडार ... ... ...
बासमती लुचइ दूबराज तोर छइहां म ममहावत हे
बिष्नुभोग सफरी बेनीकाट तोर छइंहा म इतरावत हे
स्वर्णा पल्टु सुल्टु के बाल भरे हे तोर अंचरा म
तुलसी मंजरी गुरमटिया के बाल, भरे हे तोर अंचरा म
सोना अऊ हीरा के भंडार ... ... ...
चित्रोत्पला महानदी शान से लहरावत हे
हसदो जोंक अरपा मंद-मंद मुस्कुरावत हे
इन्द्रावती खारून के धार, भरे हे तोर अंचरा म
मनियारी शिवनाथ मांड के धार भरे हे तोर अंचरा म
सोना अऊ हीरा के भंडार ... ... ...
कोइला डोलोमाइट अपार मिले हे तोर कण-कण म
चूना पत्थर लोहा अपरंपार बसे हे तोर रग-रग म
रानीदाह चित्रकूट प्रपात गिरत हे तोर अंचरा म
गंगरेल बांगों कस बांध खड़े हे तोर अंचरा म
सोना अऊ हीरा के भंडार भरे हे तोर अंचरा म
बिजली पानी कोइला इस्पात भरे हे तोर अंचरा म
सोना अऊ हीरा के भंडार ... ... ...
सोना अऊ हीरा के भंडार ... ... ...